Ernesto Guevara de la Serna
(nascut a Rosario en Argentina, en 1928 - mòrt a La Higuera en Bolívia, en 1967) èra un dirigent revolucionari e un guerrilhièr dels mai celèbres. Es mai conegut per son escais 'Che Guevara' o 'el Che'. Nasquèt dins una familha borguesa de Rosario. Semblariá que foguèsse malaut d'asma quand aviá dos ans, e que ne patiriá puèi tota sa vida. Per aquesta rason sa familha se mudèt a un endrech amb un clim
a mai sec, a Alta Gracia (Cordòba), Argentina. Pasmens sa santat se melhorèt pas e doncas son educacion primària se faguèt dins son ostal, per sa maire, Celia de la Serna.
Estudièt puèi la medecina, passèt per Guatemala ont aderiguèt a las tèsis populistas del president del país Jacobo Arbenz, que foguèt tombat mai tard pels filoimperialistas. Perseguit pels novèls governaires, partiguèt de Guatemala per passar a Mexic. Ailà s'uní al cèrcle revolucionari dels cubans exilhats que èra capitanejat per Fidel Castro. Foguèt un dels subrevivents de l'operacion "Granma", e amassa amb Castro e Camilo Cienfuegos foguèt membre de la triada que comandèt lo triomf militar dels revolucionaris contra lo govèrn Batista (gener de 1959).
Dins lo novèl govèrn cuban Che Guevara organizèt e dirigiguèt l'Instituto Nacional de la Reforma Agraria. A partir d'aquela institucion impausèt de leis agràrias novèlas, aprèp d'aver expropriat los grands proprietaris. Participèt al Departamento de Industrias e foguèt a mai nomenat president del Banco Nacional de Cuba. Foguèt lo simbòl de l'internacionalisme cuban, e de la defensa de la solidaritat antiimperialista dels païses d'America, d'Africa e d'Asia, que queda reflectida en el seu discurs a Alger (1963).
En 1965 sorprenguèt lo mond en renonciar a sas cargas de govèrn a Cuba, per dirigir la lucha revolucionària del Còngo. Aprèp aquela experiéncia, s'avodèt a la lucha guerrilhièra dins divèrses païses americans e, finalament, en Bolívia (1966).
Capturat per l'armada boliviana, amb la collaboracion de la CIA, foguèt assassinat. En 1997 sa despolha, descobèrta en 1995, foguèt enterrada a Cuba amb de ceremoniás plan importantas.
Che Guevara uèi es vengut un mite subretot en çò del jovent. Son efigia se trapa sus postèrs e bandièras, venguda pro curiosament un objècte de consomacion. Sa figura es objècte de fòrça cançons coma Hasta siempre comandante Che Guevara de Carlos Puebla o jos la version de Boikot, e Canción del elegido de Silvio Rodríguez.
Hiç yorum yok:
Yorum Gönder